இறைவன்

sundar wrote:
//சகோ. அன்பு அவர்களே, நான் இந்த திரியை இங்கு ஆரம்பித்ததற்கு  காரணம்,  தேவனை பற்றிய சில தவறான புரிதல்களுக்கு விளக்கம் அளிக்கலாம் என்ற நோக்கிலேயே அன்றி, சகோதரர் அவர்கள் கேட்டகேள்வி அடிப்படையில் தேவனை  குற்றப்படுத்த அல்ல!//

உங்கள் நோக்கத்தை நான் அறிவேன் சகோதரரே! ஆனாலும், தேவனின் தன்மையையே ஒரு விவாதப்பொருளாக்கி விவாதிக்கையில், எப்படியும் தேவத்துவத்துக்கு களங்கமுண்டாக்கும் வார்த்தைகளை யாராவது பயன்படுத்தக் கூடும் என்பதால்தான், இதெல்லாம் நமக்குத் தேவையில்லை எனக் கூறினேன்.

தேவனைப் பற்றிய தவறான புரிதல்களுக்கு விளக்கம் அளிக்கலாம் என்பதே உங்கள் நோக்கம் என்பதால், அந்த விளக்கத்தை நேரடியாகவே சொல்லியிருக்கலாம். அதைவிடுத்து, மத்தேயு 25:41,46 வசனங்களைப் போட்டு, தேவன் இரக்கமற்றவரோ எனும் தோற்றத்தை உண்டாக்கி விவாதத்தைத் தொடங்கியது எனக்கு சரியாகப்படவில்லை.

யோபு 23:7-ஐ சுட்டிக்காட்டியிருந்தீர்கள். ஆனால் அவ்வசனம் என்ன சொல்கிறது? (துன்மார்க்கன் அல்ல) சன்மார்க்கன் தேவனோடு வழக்காடலாம் என்றே!

அதுவும் பொதுப்படையான விஷயங்களுக்காக அல்ல, தனது சொந்த பாதிப்புகளுக்காக சன்மார்க்கன் தேவனோடு வழக்காடலாம் என்றே யோபு கூறுகிறார். அதன்படியே யோபுவும் வழக்காடினார். யோபு ஒரு சன்மார்க்கன் என தேவனிடம் சாட்சி பெற்றவர். அப்படிப்பட்ட அவர் முகாந்தரமில்லாமல் கொடிய துன்பங்கங்களை அனுபவிக்க நேரிட்டது. அதோடு மட்டுமின்றி, யோபு செய்த குற்றங்களுக்காகத்தான் யோபு தண்டிக்கப்படுகிறார் என அவரது நண்பர்கள் வேறு அவரை நோகடித்தனர். எனவேதான் தனக்கு வந்த துன்பங்களுக்கான காரணம் என்ன எனக் கேட்டு தேவனோடு அவர் வழக்காடினார். அவரது செயலும் நாம் இங்கு கிளப்பியிருக்கும் பிரச்சனையும் ஒரேவிதமானவையல்ல.

மத்தேயு 25:41,46-ல் தேவன் வழங்கும் நியாயத்தீர்ப்பிற்கான முகாந்தரத்தை soulsolution உட்பட நாம் அனைவரும் நன்கறிவோம். அப்படியிருக்க தேவனின் அந்த நியாயத்தீர்ப்பான செயலை இரக்கமற்ற செயலாகக் காட்டி விவாதிப்பது சரியல்லதானே?

யாக்கோபு 2:13-ன் கூற்று தேவனுக்குப் பொருந்துமா எனும் கேள்விக்கு நான் பதில் சொல்லத் தயாரில்லை. ஆனால் மத்தேயு 25:41,46-ன் அடிப்படையில் தேவனை இரக்கமற்றவராக சித்தரிப்பது தவறு என நான் திட்டமாகக் கூறுவேன். இது மிகவும் எளிதான விஷயம். மிகமிக இரக்கமுள்ளவரான ஒரு நீதிபதி கொலை செய்த ஒருவனுக்கு மரண தண்டனை கொடுக்கையில், அந்த நீதிபதி இரக்கமற்றவர் என நாம் சொல்கிறோமா? நிச்சயமாக சொல்லமாட்டோம். நியாயப்படி, சட்டப்படி தீர்ப்பளித்துள்ளார் என்றுதான் சொல்வோம்.

ஒருவேளை கொலைக் குற்றவாளி அவரது மகனாக இருந்து, அவனுக்கு மரணதண்டனை கொடுத்தால்கூட, அவரை பாசமற்றவர் என நாம் கூறமாட்டோம். சிறந்ததொரு நியாயாதிபதி என்றுதான் சொல்வோம்.

அதுபோலவே நியாயாதிபதியான இயேசு, குற்றம் செய்தவர்களான வெள்ளாட்டுப்பிரிவினரை சபிக்கப்பட்டவர்கள் என்று சொல்லி நித்திய ஆக்கினையை தண்டனையாகக் கொடுக்கையில், அவரை இரக்கமற்றவர் எனச் சொல்ல எந்த முகாந்தரமும் கிடையாது. இரக்கமுள்ளவரான அவர், நியாயாதிபதி ஸ்தானத்தில் இருக்கையில் நியாயமான தீர்ப்பு வழங்கியுள்ளார் என்று மட்டுமே சொல்லமுடியும்.

உண்மையில் நியாயந்தீர்ப்பது இயேசுவல்ல, அவரது வசனம்தான் அங்கு நியாயந்தீர்க்கிறது (யோவான் 12:48).