இறைவன்

நாம் ஏன் வேத வசனங்களை ஆராய வேண்டும் என்று வேதம் சொல்கிறது!

 

யோவான் 5:39 வேதவாக்கியங்களை ஆராய்ந்துபாருங்கள்; அவைகளால் உங்களுக்கு நித்தியஜீவன் உண்டென்று எண்ணுகிறீர்களே, என்னைக்குறித்துச் சாட்சிகொடுக்கிறவைகளும் அவைகளே. 

 

இயேசுவை குறித்த சாட்சி வேத வாக்கியங்களில் இருக்கிறது என்பதை அறிந்துகொள்ள நாம் வேதத்தை ஆராய வேண்டும். ஆனால் நாம் இயேசுவை அறிந்து அவரால் நித்திய ஜீவன் உண்டு என்பதை ஏற்கெனவே ஏற்றும் கொண்டுவிட்டோம்.  

 

அடுத்து முக்கியமாக நாம் எதற்க்காக வேத வசனங்களை ஆராய வேண்டும்?

 

அப்போஸ்தலர் 17:11 அந்தப் பட்டணத்தார் மனோவாஞ்சையாய் வசனத்தை ஏற்றுக்கொண்டு, காரியங்கள் இப்படியிருக்கிறதா என்று தினந்தோறும் வேதவாக்கியங்களை ஆராய்ந்துபார்த்ததினால், தெசலோனிக்கேயில் உள்ளவர்களைப்பார்க்கிலும் நற்குணசாலிகளாயிருந்தார்கள்.

 

ஆம்! நாம் வேதத்தை ஆராய்ந்து பார்த்து அதிலுள்ள வார்த்தைகளை கைகொண்டு நடப்பதன் மூலம் நற்குணசாலிகலாக மாறமுடியும்.   

அதற்காகவே முக்கியமாக நாம் வேதத்தை ஆராய வேண்டும்! 

 

ஆனால் தேவனையும் அவர் மகத்துவத்தையும் அவர் செயல்பாடுகளையும் நாம் ஒருபோதும் ஆராய்ந்து அறிந்துவிட முடியாது 

 

சங்கீதம் 145:3 கர்த்தர் பெரியவரும் மிகவும் புகழப்படத்தக்கவருமாயிருக்கிறார்; அவருடைய மகத்துவம் ஆராய்ந்துமுடியாது.

யோபு 36:26 இதோ, தேவன் மகத்துவமுள்ளவர்; நாம் அவரை அறிய முடியாது; அவருடைய வருஷங்களின் இலக்கம் ஆராய்ந்து முடியாதது.

 

ஏசாயா 40:28 பூமியின் கடையாந்தரங்களைச் சிருஷ்டித்த கர்த்தராகிய அநாதிதேவன் சோர்ந்துபோவதுமில்லை, இளைப்படைவதுமில்லை; இதை நீ அறியாயோ? இதை நீ கேட்டதில்லையோ? அவருடைய புத்தி ஆராய்ந்து முடியாதது.

 

ஆம் தேவனை ஒருபோதும் ஆராய்ந்து அறிந்துவிட முடியாது! 

 

நான் தேவனால் அபிஷேகிக்கபட்டபோது அவர் எனக்கு சொன்ன வார்த்தை "அநேகர் வேத வசனத்தை எடுத்துகொண்டு என்னை ஆராய்ந்து அறியவும்  ஆராய்ச்சி செய்து கண்டுபிடிக்கவும் முற்ப்படுகிறார்கள், ஆனால் என்னை ஒருபோதும் ஆராய்ந்து கண்டுபிடித்துவிட முடியாது" என்பதே!      

 

தேவன் தன்னை வேதாகம வார்த்தைகள்  மூலமும் தன்  குமாரன் மூலமும் உலகுக்கு வெளிப்படுத்தியிருக்கிறார் என்பது உண்மையே  

 

எபிரெயர் 1:1 பூர்வகாலங்களில் பங்குபங்காகவும் வகைவகையாகவும், தீர்க்கதரிசிகள் மூலமாய்ப் பிதாக்களுக்குத் திருவுளம்பற்றின தேவன்,

 

ஆனாலும் அவர் வெளிப்பாடுகளை நாம் மனித மூளையின் ஆராய்ச்சி மூலமாக முழுமையாக அறிந்துவிட முடியாது!    

 

காரணம் தேவன் ஞானிகளைவிட குழந்தை போன்ற இன்னொசென்ட் களுக்கு தன்னை வெளிப்படுத்த சித்தமுள்ளவராக இருக்கிறார்.

 

லூக்கா 10:21 அந்த வேளையில் இயேசு ஆவியிலே களிகூர்ந்து: பிதாவே! வானத்துக்கும் பூமிக்கும் ஆண்டவரே! இவைகளை நீர் ஞானிகளுக்கும் கல்விமான்களுக்கும் மறைத்து, பாலகருக்கு வெளிப்படுத்தினபடியால் உம்மை ஸ்தோத்திரிக்கிறேன்; ஆம், பிதாவே! இப்படிச் செய்வது உம்முடைய திருவுளத்துக்குப் பிரியமாயிருந்தது. 

 

 

ஒருவர் தன்  ஞானத்தை வைத்து வேதத்தை ஆராய்ந்து நான் தேவனை கண்டுபிடித்துவிட்டேன் என்று  சொல்வாராகில் அவர் சரியானதை கண்டுகொள்ளவில்லை என்பது திண்ணம். எனினும் பலர் அங்கொன்றும் இங்கொன்றுமாக அனேக வசங்களை சுட்டிகாட்டி தாங்கள் தேவனை அறிந்துவிட்டதாக கூறிவருகின்றனர்.  அதில் நிச்சயம் உண்மை இருக்காது என்பது என்னுடைய கருத்து. ஆகினும் அவர்கள் தாங்கள் அறிந்ததற்குமேல் ஒன்றுமில்லை என்ற வீண் பிடிவாதத்தின் மூலம் அதற்க்குமேல் எதையும் ஏற்க்க மறுக்கிறார்கள்.

 

அதுபோல் பலரை நான் என் வாழ்வில் சந்தித்திருக்கிறேன் "இது இப்படி இருக்கவே முடியாது" "இது இப்படித்தான் என்று எனக்கு நன்றாகவே  தெரியும்" "எனக்கு தெரியாமல் அப்படியொன்று இருக்க/ நடக்க  சாத்தியமே இல்லை"  என்று சொன்னவர்கள் எல்லாம் உண்மையை அறிந்தபோது எதுவும் பேசாமல் மௌனமாகி போனதுண்டு.  ஏன்  நானும் கூட "கடவுள் என்று ஒருவர் இருக்க சாத்தியமே இல்லை" என்பதுபோல் கூறியவந்தான் ஆனால் அவரின் மேன்மையில் ஒரு சிறு பகுதியை அறிந்தபிறகு, அன்று அவ்வாறு கூறியதற்காக வெட்கப்படுகிறேன்.       

     

இப்படி ஆராயமுடியாத மகத்துவமுள்ள தேவன் "என்னை தேடுபவர்களுக்கு நான் தென்படுவேன்" என்று சொல்லும் பல வசனங்களை நாம் பார்க்க முடியும்!

  

எரேமியா 29:13 உங்கள் முழு இருதயத்தோடும் என்னைத் தேடினீர்களானால், என்னைத் தேடுகையில் கண்டுபிடிப்பீர்கள்.

 

II நாளாகமம் 15:2  சகல மனுஷரே, கேளுங்கள்; நீங்கள் கர்த்தரோடிருந்தால், அவர் உங்களோடிருப்பார்; நீங்கள் அவரைத் தேடினால், உங்களுக்கு வெளிப்படுவார்;

 

 I நாளாகமம் 28:9  கர்த்தர் எல்லா இருதயங்களையும் ஆராய்ந்து, நினைவுகளின் தோற்றங்களையெல்லாம் அறிகிறார்; நீ அவரைத் தேடினால் உனக்குத் தென்படுவார்

  

இங்கு தேவன் தெளிவாக சொல்கிறார் அவரை முழு இருதயத்தோடு தேடினால் மட்டுமே கண்டடைய முடியுமேயன்றி வசனத்தை ஆராய்ந்து அவரை கண்டுகொள்ள முடியாது. எனவே நாலு வசனங்களை சுட்டிகாட்டி இவர்தான் அவர் அவர்தான் இவர் என்ற அனுமானம் எல்லாம் தேவையற்றது. அவர் தன்னை ஒருவருக்கு வெளிப்படுத்தவில்லை என்றால் அவர் யாரென்று யாராலும் அறிய முடியாது.   

 

எனவே வேத வசனங்களை ஆராய்ந்து அதன்படி நடந்து நற்குணசாலிகளாக மாறுவோம்! தேவனை அறியும் அறிவை பெற அவரை முழு இருதயத்தோடும் முழு மனதோடும் தேடுவோம்!